मंसिर ४ मा हुने निर्वाचनमा सत्ता साझेदार पाँचै दल तालमेल गरेर जाने सहमति

पांच दलीय सत्ता गठबन्धनको आज बसेको बैठकमा आगामी मङ्सिर ४ गते हुने प्रतिनिधिसभा सदस्य र प्रदेशसभा सदस्य निर्वाचनमा पाँचै दल तालमेल गरेर जाने सहमति भएको छ ।

शुक्रबार प्रधानमन्त्री निवास बालुवाटारमा प्रधानमन्त्री एवम् नेपाली कांग्रेसका सभापति शेरबहादुर देउवाको अध्यक्षतामा बसेको सत्ता गठबन्धन बैठकले उक्त सहमति गरेको हो ।

प्रधानमन्त्री देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादी पार्टीका अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादव र राष्ट्रिय जनमोर्चाका अध्यक्ष दुर्गा पौडेलद्वारा जारी संयुक्त विज्ञप्तिमा बैठकले आगामी मङ्सिर ४ गते हुने प्रतिनिधिसभा र प्रदेशसभाको निर्वाचनमा पाँचदलीय गठबन्धनबीच चुनावी तालमेल गरी अगाडि बढ्ने निर्णय भएको उल्लेख छ ।

प्रतिनिधिसभामा १६५ र प्रदेशसभामा ३३० सिट हुने चुनावमा न्यायोचित ढंगले तालमेल गर्नका लागि फेरि बैठक बस्ने र सहमति गर्ने निर्णय भएको पनि सरकारका प्रवक्ता एवं सूचना तथा सञ्चार मन्त्री ज्ञानेन्द्रबहादुर कार्कीले बताउनुभयो ।