तिब्बतमा कोभिड संक्रमण दर बढेको भन्दै तातोपानी नाका बन्द

तिब्बतमा कोभिड संक्रमण दर बढेको भन्दै सिन्धुपाल्चोकको तातोपानी नाका बन्द भएको छ । नाका बन्द भएसँगै तीन दिन अघिदेखि सो नाकाबाट चिनियाँ सामान आयात हुन पाएको छैन ।

तातोपानी सुख्खा बन्दरगाह भन्सार कार्यालयका प्रमुख नारद गौतमले बुधबारदेखि चीनबाट सामान आयात नभएको जानकारी दिनुभयो । तिब्बतमा कोभिड संक्रमण दर बढेको भनिए पनि अब कहिले खुल्ने भन्नेबारे केही जानकारी नआएको उहाँले बताउनुभयो ।

तिब्बतमा कोभिड संक्रमण बढेर आयात रोकिएको भन्ने आफूलाई जानकारी प्राप्त भएको सिन्धुपाल्चोक प्रमुख जिल्ला अधिकारी बेदनिधि तिवारीले बताउनुभयो । ‘खासा क्षेत्रमा ५८ जना कोभिड संक्रमित भेटिएको खबर आएको छ’ प्रजिअ तिवारीले भन्नुभयो । कहिले नाका सूचारु हुन्छ भन्ने जानकारी नआएको उहाँको भनाइ छ ।  

सो नाकाबाट दैनिक २ देखि ८ कन्टेनर चिनियाँ सामग्री नेपाल आयात हुदैं आएको थियो । स्याउ, मेशिनरी उपकरण, रोल कपडा आयात भइरहेका थिए । जुरे पहिरो, भूकम्प, बाढीपहिरो, कोरोना महामारी लगायतका बिपदका कारण सो नाका बन्द हुने र खुल्ने हुँदैं आएको छ ।