आफ्नै श्रीमतीको हत्या गरेको आरोपमा भिमेश्वर ९ का एक पुरुष पक्राउ

दोलखा । दोलखाको भीमेश्वर नगरपालिका ९ का एक पुरुषलाई आफ्नै श्रीमतिको हत्या गरेको आरोपमा प्रहरीले पक्राउ गरेको छ ।

भीमेश्वर नगरपालिका वडा नम्बर ९ चिसोपानी स्थायी घर भई ललितपुरमा बस्दै आएका ६२ वर्षिय पेमा घ्याल्बो लामाले आफ्नै श्रीमतिको हत्या गरेको खुलेको हो ।

ललितपुरको गोदावरी नगरपालिका वडा नम्बर ३ स्थित फुलचोकी जंगलमा निज तमाङको श्रीमती ४७ वर्षिया रुपा क्षेत्रीको शव फेला परेको थियो । ललितपुर महानगरपालिका २९ स्थित हरिसिद्धि बस्दै आएकी क्षेत्रीको हत्यामा उनकै श्रीमानलाई प्रहरीले पक्राउ गरी पत्रकार सम्मेलन गरेर सार्वजनिक गरेको हो । ललितपुरका एसएसपी यज्ञविनोद पोखरेलले आज पत्रकार सम्मेलन गरी रुपालाई उनकै पति घ्याल्बो लामाले हत्या गरेर जंगलमा फालेको जानकारी दिएका छन् । निजकी श्रीमती गत भदौ १६ गतेदेखि हराईरहेका थिए ।

काठमाडौं उपत्यकामा घर बनाउने कामदारलाई संयोजन गरेर साना ठेक्का लिएर जिविकोपार्जन गर्दै आएका लामाले पत्नीलाई योजनाबद्ध तवरले हत्या गरेको प्रहरी अनुसन्धानबाट खुलेको छ । दैनिक मदिरा सेवन गरी झगडा गरेर हैरानी दिएकाले आफुले नै श्रीमतिको हत्या गरेको आरोपितले प्रहरी समक्ष बयान दिएका छन्‌ । हत्या भएको पत्नी लामाको कान्छी श्रीमती हुन् ।