हेलम्बुको खोलामा हिजोदेखी बेपत्ता भएका दोलखाका शिवाकोटी २२ घण्टा पछि जिवितै उद्दार
सिन्धुपाल्चोकको हेलम्बु १ नाकोटे स्थित ठाडो खोलामा मा नुहाएर फर्किने क्रममा चिप्लिएर हिजोदेखी बेपत्ता भएका शिक्षकको करिव २२ घण्टापछि जिबितै उद्धार गरिएको छ । दोलखा जिल्ला कालिञ्चोक गाउँपालिका वडा नम्बर ३ का ३७ वर्षिय शिक्षक केशव शिवाकोटीको उद्धार गरिएको हो ।
उनलाई नेपाली सेनाको हेलिकोप्टर झिकाई जिबितै उद्धार गरिएको ईलाका प्रहरी कार्यालय हेलम्बुले जानकारी दिएको छ । केही घाईते अबस्थामा खोलाको अप्ठ्यारो खोँचमा भेटिएका उनलाई उद्धार गरी थप उपचारका लागि काठमाण्डौं लगिएको छ ।
शनिवार दिउँसो करिव १ बजेको समयमा बेपत्ता भएका उनको हिजो देखिनै प्रहरी र स्थानीयको टोलीले खोजी सुरु गरेका थिए । आज विहान उनलाई आवाजको संकेतले फेला पारिएको प्रहरीले जनाएको छ । लडेर खोलाको अप्ठेरो खोँचमा फसेकाले शिवाकोटीको उद्धारको लागि नेपाली सेनाको हेलिकोप्टर झिकाईएको हो ।
उनी स्थानीय सर्कथली आधारभुत विद्यालयमा अध्यापन गराउने शिक्षक हुन् । संगै अन्य ४ जना शिक्षकहरु ठाडो खोलामा नुहाएर फर्किने क्रममा शिवाकोटी चिप्लिएर खोलामा लडेका थिए ।
