खुद्रा आलुको भाउ मुडेमा नै पुग्यो प्रतिकिलो ६० रुपैयाँ, अझै बढ्न सक्ने आँकलन

सिन्धुपाल्चोक असोज १३ गते । केही दिन अघिसम्म स्थिर रहेको मुडेको रातो आलुको भाउ अहिले मुख्य आलु उत्पादन हुने ठाउँ मुडे बजारमा नै केजिको ६० रुपैयाँ (प्रती धार्नी १५० रुपैयाँ) पुगेको छ ।

केही दिन अघिसम्म खुद्रा मुल्य प्रतिकिलो ५२ देखि ५५ रुपैयाँमा पाउने मुडेको रातो आलु अहिले प्रतिकिलो ६० देखि ६३ रुपैयाँ सम्म बेच्ने गरेको स्थानीय व्यापारीहरु बताउँछन् । काठमाडौमा आलुको भाउ बढे सँगै मुडेमा पनि आलुको भाउ बढेको उनिहरु बताउँछन् ।

काठमाडौमा आलुको भाउ नबढेर स्थिर रहिरहेको अवस्थामा यताबाट काठमाडौमा बिक्रीको लागि लैजाने व्यापारीहरुले पनि आलुको भाउ बढ्ने आशामा काठमाडौ नलगेर गोदाममै थन्क्याईरहेका थिए ।

शुरु शुरुमा खनेको आलु धेरै कुहिएर नोक्सान व्यहोर्नुपर्ने भएको कारणले पनि काठमाडौमा आलुको भाउ नबढेकोले यहीँ गोदाममा नै थन्काउन वाध्य भएको एक व्यापारी बताउँछन् ।

गर्मी ठाउँमा छिटो फलेको आलु भन्दा मुडेको चिसोमा ढिलो फलेको आलु धेरै मीठो हुने भएकोले पनि मुडेको आलुले काठमाडौमा एउटा ब्राण्ड नै बनाएको छ । कालिमाटी तरकारी बजारमा मुडे आलु भनी नामांकित आलुको रेट नै छुट्टै हुने गर्दछ । यहाँको आलु फल्नको लागि कम्तीमा पनि ६ महिना देखि ८ महिना सम्म लाग्ने गर्दछ । रोपेको ६ महिनामै खनेको आलु कुहिने समस्या हुने गरेकोले आलुको भाउ पनि सस्तो हुन जाने र हिजोआज खनेको आलु नकुहिने र स्वादिलो पनि हुने भएकोले अहिले मुडेको आलु महंगिँदै गएको पनि व्यापारी हरु बताउँछन् ।

मुडेको आलुको भाउमा भारतबाट आयात भएको आलुले पनि केही प्रभाव पार्ने गरेको छ । भारतीय आलु सस्तो मुल्यमा आईपुग्दा बजारमा सस्तो आलु सँग प्रतिस्पर्धा गर्नुपर्ने भएको हुँदा यहाँको आलु पनि केही मात्रामा सस्तो नै हुन जाने हुन्छ । तर प्रायजसो असोज लागिसकेपछी मुडेको आलु महंगिँदै जाने पनि विगतको इतिहासले देखाईरहेको छ ।