लगातारको बर्षाले दशैं मनाउन पाएनन्, बाढीको भेलमा गाउँ डुब्यो (फोटोफिचर)

दाङ, असोज २१ गते । दशैंको बेला भएको लगातारको वर्षाका कारण दाङको लमही नगरपालिका वडा नं ८ धनपुरुवा गाउँ बाढीको भेलमा डुबेको छ । राप्ती नदीमा आएको बाढीले धनपुरुवा गाउँलाई  डुवानमा पारेपछी दशैं मनाउन त परे जाओस् । आफू बच्नका लागि मात्रै सोच्नुपर्ने भएको छ । सरकारको तर्फबाट उद्धार कार्य भने जारी रहेको छ ।

५० जनाभन्दा बढी गाउँबासी बाढीमा फसेका छन् । डुङ्गाबाट उद्धार गर्ने काम भइरहेको  शसस्त्र प्रहरी बल २९ नं गण भालुवाङका प्रमुख विनोद केसीले जानकारी दिनुभयो । अहिले शसस्त्र प्रहरी र नेपाली सेनाको गरी दुई वटा डुङ्गा उद्धारमा परिचालन गरिएको छ । थप डुङ्गासहितको तालिम प्राप्त जनशक्ती माग गरिएको उद्धार टोलीका सदस्यले बताएका छन् । 

आज दिउँसोदेखि उद्धारको काम शुरु गरिएको थियो । अहिलेसम्म भेलमा फसेका १३ जनाको उद्धार गरिएको र बाँकीको पनि उद्धार कार्य जारी रहेको टोलीले जनाएको छ । उद्धारका लागि हेलिकप्टर माग गरिए पनि प्रतिकुल मौसमका कारण हेलिकप्टर आउन नसकेको बताइएको छ । 

भेलमा फसेकाहरु घरको छत, रुखमा चढेर ज्यान जोगाउन बाध्य भएका छन् । लगातार बर्षा भइरहेको र पानीको बहाव नघटेका कारण उद्धारमा पनि समस्या भएको प्रहरीले जनाएको छ । भेलमा फसेका सबैको उद्धार गर्न रातभरी समय लाग्ने उद्धारमा सहभागी एक प्रहरीले बताउनुभयो ।